مندهشة!!!
اكتر حاجه بتخلينى فعلا مندهشة هو الاندهاش فى حد ذاته،يعنى انك تلاقى الناس بتستغرب من حاجات عجيبه وطبيعيه وتلاقيهم بيتسألوا ويتحاوروا على الرعم من إن الموضوع بيكون مكرر وعادى وممل أحياناً.
يعنى مثلا تلاقى الناس بتندهش ان جريدة الاهرااااام فبركت صوره وفضحتنا وجرستنا وكلام من ده ، وتلاقيهم كمان مستغربين جدا من موقف الحكومة من العمال اللى كل يوم واقفين على الارصفة بيطالبو بحقوقهم وتلاقى البرامج تتكلم ومصطفى حسين يرسم وكده يعنى ، وكمان بيستغربوا اووى من موقف مصر الدولى ودور مصر الرائد ومكانة مصر العربية وكلام من ده كتيييير.
المصيبة كمان انهم بيتعجبوا من المواقف الاجتماعية الصغيرة الموجوده فى حياتنا ، زى انهم يلاقوا اب قتل ابنته أو بنت قتلت مامتها والحاجات البسيطة اللى زى دى ، وكمان يندهشوا ان فى ناس بتسرق فلوس البلد وتمشى ويشوفوا كمان ان دى خيانه عظمى للبلاد.
مع ان انا بصراحه مش شايفه اى وجه للدهشة لان ده طبيعى فى مجتمعنا الدولى الكبير ده لاننا بنى ادمين والبنى ادم بطبعه وفطرته "غبى " و "أنانى" ومستعد انه يعمل اى شئ فى سبيل انه يحقق غايته او هدفه يبقى ليه الاستغراب لما انت ممكن فى يوم من الايام تكون فى نفس مكان الناس اللى انت متعجب من تصرفاتهم دووول.
كل واحد فينا فى لحظات تحقيق رغباته الملحة بيكون اجشع الكائنات على وجه الارض وكل اللى بتندهش منه النهارده بكره يكون عااادى عشان ببساطه هى دى الحقيقه يعنى مثلا لما تندهش ازاى البوليس والشرطه اللى بيحمينا يكون هو مصدر قلقنا وتقعد تحتار ازاى يعملوا كده فى خالد سعيد وغيره، هتلاقى نفسك بعد فترة بتألف الموضوع ده وبتتعامل معاه بواقعية على انه حقيقه وده مجرد مثال مش اكتر.
لذا ارجوك عزيزى المواطن لاتندهش ودع القافله تسير لانها كده او كده غصب عنك هتسييير.
ليست هناك تعليقات:
إرسال تعليق