Happy New Year

هابى نيو يييير

سنة جديدة سعيدة إن شاء الله

سنة منشوفش فيها أبناء مبارك ولا مبارك نفسه

سنة نحاكم فيها طنطاوى ومجلسه العار

سنة ننتخب فيها رئيس جديد يعبر عننا كلنا من غير ما ينحاز لحد

سنة مفيهاش عكاشة وزبايدر ولا أى تافه آثم قلبه مُدعى ومنتهك لأعراض الناس

سنة نقدر نرجع فيها حق ما يقرب من 1000 شهيد

سنة مفيهاش مجتمع شايل المرأة فوق دماغه ولو حد إتحرش بيها يقولها إنتى السبب ولو حد سحلها وعراها فى الشارع يقولها ايه اللى نزلك ولو ريحت الكل وقعدت فى البيت يقولها ما هو انتى ملكيش لزمة

سنة محدش يكلمنا فيها عن هوية مصر ويقولنا هى إسلامية لاء عربية لاء مدنية لاء علمانية

سنة محدش بيخون فيها ثوار التحرير

سنة أتنقل فيها بين كل محافظات مصر ومحسش انهم مختلفين عن بعض فى الاهتمام

سنة مفيهاش إصطهاد لاى حد عشان مختلف سواء دينيا أو إجتماعياً أو جنسياً

سنة مفيهاش أحداث طائفية مصطنعة من اللى بيثيرها النظام

سنة الشعب فيها خلاص أسقط النظام

سنة مشوفش فيها مدرعات جيش فى الشوارع عشان مصر مش ثكنة عسكرية

سنة محدش يموت فيها عشان مشارك فى مظاهرة أو إعتصام أو مسيرة

سنة لما نيجى نحصد نهايتها منعددش الشهداء اللى ماتوا فيها والمصابين اللى لسه بيتعالجوا

سنة مشوفش فيها دمعة لأم شهيد

بس ده مش معناه إن 2011 كانت وحشة ، على الرغم إن مشاهد العنف كانت غالبة على كل حدث فيها إلا إننا عرفنا فيها وإمتشفنا فيها حاجات كتير

2011 بقى

عام سقوط الاقنعة

عام إنشغال المصريين بمصر

عام سقوط 3 رؤساء عرب

عام شوفنا فيه أبطال زى أحمد حرارة وسميرة إبراهيم وعلاء عبد الفتاح وخالد سعيد ومينا دانيال والشيخ عماد عفت وسالى زهران وغيرهم كتير أووووى

عام شهداء الحرية اللى نوروا حياتنا

عام بداية الحرية

عام الثورات اللى هتكتمل فى 2012

عام كسر كل التابوهات

أنا مش زعلانة من 2011 ومش هزعل إن شاء الله من 2012

الاجابة دائما : تونــــــــــــــس

13/12/2010

زى النهاردة قام محمد البوعزيزى الشاب التونسى خريج الجامعة بإحراق نفسه بعد أن رفض أن تقوم شرطية تونسية بصفعه على وجهه وطالب بحقه .

17/12/2010

توفى البوعزيزى متأثراً بالحروق البالغة التى ألمت به ، ومن وقتها قامت الثورة التونسية " ثورة الياسمين" لتطيح بالرئيس التونسى السابق زين العابدين بن على

من بداية الثورة فى مصر ولغاية ما تنحى مبارك وتولى الجيش المسئولية كانت دايما الاجابة تونس ، الجيش فى تونس معملش زى طنطاوى ، الجيش هناك عارف انه مش بيفهم فى السياسة وقالهم انا حميتكم لكن هارجع تانى مكانى ومش هاكون فى اى منصب سياسى .

الاجابة تونس عشان هناك قرروا يختاروا لجنة مستقلة إسمها " الهيئة العليا لتحقيق أهداف الثورة" وكانت تضم الاحزاب التى ناضلت ضد بن على ومنظمات المجتمع المدنى وشباب الثورة وكان هدفها ملئ الفراغ الدستورى بعد رحيل الرئيس التونسى المخلوع ز

الاجابة تونس بالذات بعد ما شوفنا إنتخابات المجلس التأسيسى يوم 23 أكتوبر اللى قدر التونسيين يظهروا فيه حضارتهم وإستعدادهم القوى لخلق وطن جديد ، كانوا واقفين صفوف طويلة وكانت نسبة المشاركة 90 % - من غير ما حد يخوفهم بغرامة - وحزب النهضة فاز بنسبة 40% من المجلس التاسيسى وأعلن رئيسه إنه مستعد يتعاون مع أى فصيل سياسى حتى العلمانيين .

الاجابة تونس لانهم النهاردة وفى يوم الذكرى الاولى لحرق البوعزيزى نفسه إختاروا رئيساً مؤقتاً للبلاد منصف المرزوقى - وهو أكبر معارض لبن على وصاحب توجه يسارى ومن إختاره هم أعضاء المجلس التأسيسى الذى يحوى أغلبية من التيار الاسلامى - وأدى هذا الرئيس اليمين الدستورية وهو يبكى دماء الشهداء.

الاجابة تونس عشان مفيش هناك مجلس عسكرى ومفيش هناك شرف ومفيش جنزورى ومفيش ناس بتقول جتكوا نيلة خربتوا البلد

يعيش كفاح تونس ، وهنقول زى ما قلنا بعد رحيل بن على " عقبــــــــــــالنا " .

لحظة بكاء منصف المرزوقى الرئيس التونسى المؤقت :

فى شارع محمد محمود

من أول ما دخلت الميدان يوم مليونية الانقاذ الوطنى 22/11/2011 وأنا عماله أكح ومش عارفه أتنفس قولت لنفسى أومال لو الغاز المسيل للدموع إتضرب قدامى هأعمل ايه وهيحصلى ايه .. ومن ساعه ما دخلت والميدان مختلف عن أيام ثورة يناير مش مختلف فى الوشوش وانهم مش الشباب " الطاهر" والكلام الفارغ ده .. ولكنه مختلف لانه مليان دم فعلا مش عارفين نحتفل زى ما كنا بنعمل مش قادرين نضحك ونسخر من الوضع كل شويه نسمع سرينة الاسعاف وهى بتنقل مصابين ونسمع عن قتلى ونشوف حالات إغماء كتيرة جدا بشكل مرعب .

المهم .. إنى كنت واقفه على ناصية شارع محمد محمود وشايفه ان فى ناس كتير بتخرج تعبانه ومش قادره تستحمل ريحة الغاز وأنا هاموت وأدخل الشارع .ز المهم فضلت أدخل حبه بحبه لحد ما وصلت عند أول تقاطع ولقيت ناس واقفه بتهتف وبدأت أصور .. شويه كده وسمعنا صوت رصاص وهوووب لقينا قنبلة غاز مسيل وقعت فى وسطنا - كنت متوقعه انى هأستحمل ريحة الغاز وإنى قويه والكلام ده- بصراحه كده اول ما شمتها ما استحملتش ولقيت عينى بتحرقنى اوى ومش شايفه قدامى فعلا لولا فى ولد مسكنى من ايدى لغايه لما خرجنى من الميدان - هاموت وأشكره- بس فعلا اللى أسوأ من الغاز هو تدافع الناس اللى ممكن يموت أى حد .

الموقف ده خلانى زعلانه من نفسى أوووى وخلانى عاوزه اهزق نفسى لانى مستحملتش شويه غاز على الرغم ان فى ناس واقفه ومستحمله علشان تحمينا فى الميدان كان نفسى بس أكون ذرة فى شجاعتهم وقدرتهم على التحمل "أبطال الالتحرير موجودين فى محمد محمود" وأى واحد ملوش أى لزمه هيقول كلمه عليهم يبقى ينقطنا بسكاته .

مؤتمر "لا للمحاكمات العسكرية" : يسقط يسقط حكم العسكر

علاء الاسوانى: "الشرطة العسكرية جهاز قمعى جديد يضاف إلى أمن الدولة.

جمال عيد :المجلس العسكرى قليل القيمة وكذاب.

خالد على : نرفض أن يحتمى المجلس العسكرى بالجيش ليستمر فى الحكم.

(وللأسف علاء سيف إتجدد لحبسه الاحتياطى)

كان فى مؤتمر صحفى إمبارح لمجموعة لا للمحاكمات العسكرية حضره الكاتب علاء الاسوانى والبابا فلوباتير وخالد على مدير المركز المصرى للحقوق الاقتصادية والاجتماعية ورشا عزب من مجموعة لا للمحاكمات العسكرية وأخت مينا دانيال وخطيبة مايكل مسعد وجمال عيد مدير الشبكة العربية لمعلومات حقوق الانسان وناس كتير جداً مهتمة بوقف المحاكمات العسكرية للمدنيين خاصة بعد ما الناشط علاء عبد الفتاح إتقبض عليه وتم حبسه إحتياطياً والحبس إتجدد له مرة تانية بتأكيد من أخته منى سيف .

خلاصة المؤتمر

علاء الاسوانى: أرفض المحاكمات العسكرية للمدنيين لإن الثورة المصرية قامت عشان يُعامل الانسان المصرى كمواطن له حقوق وكرامة كاملة ومصونة ، فجهازى المباحث وأمن الدولة كما هما على الرغم ما أذيع من حلهما ولكن اللى حصل معاهم هو تغيير الاسم فقط - كأن الاسم كان هو مشكلة المصريين مع أمن الدولة - مع إضافة جهاز قمعى جديد هو "الشرطة العسكرية" اللى إرتكبت جرائم يُعاقب عليها دولياً.

وعن ماسبيرو والمجزرة اللى حصلت فى أكثر من 12 فيديو لحادثة ماسبيرو بيوضحوا دهس المواطنين بالمدرعات ، وده بيأكد إن المجلس العسكرى بيصبح خصم فى القضية دى فإزاى تنظر قدام النيابة العسكرية ويصبح الخصم حكم فى نفس الوقت ، عشان كده لازم نطالب بإلغاء القضاء الاستثنائى بجميع أشكاله مثل " محكمة أمن الدولة طوارئ" اللى بتعتبر فى بعض الاحيان أسوأ من القضاء العسكرى ، ويجب أن يتم التحقيق فى جرائم الشرطة العسكرية التى إذا لاحظنا سنجد إنها لا تتحرك إلا لقمع الثوار أو لإنقاذ شخصية تنتمى إلى نظام مبارك مثلما فعلت مع طلاب كلية الاعلام وطلاب أكاديمية أخبار اليوم، ولا تتحرك فى حالات قطع الطرق وخطوط القطارات، عشان كده تحركاتها ليس إعتباطاً وإنما لها دلالات.

خالدعلى مدير المركز المصرى للحقوق الاقتصادية والاجتماعية: المجلس العسكرى حاكم ما يقرب من 15 ألف مدنى إلى الان بحجة الاستقرار والحفاظ على هيبة الدولة ومنع الفوضى .. أين الاستقرار الان وهل المحاكمات العسكرية منعت البلطجية ؟ ولكنها تهدف لمعاقبة الثوار وتقويض الثورة المصرية، ولذلك يجب وضع مرسوم بقانون يوضح ان الاحتكام إلى القضاء العسكرى بهدف حماية الجيش داخل ثكناته ليس وهو يدير شئون البلاد ، لاننا نرفض المجلس العسكرى ونشير إليه بأصايبع الاتهام فى قتل المصريين ونرفض أن يحتمى المجلس العسكرى بالجيش و- حجة الوقيعة بين الجيش والشعب - ليستمر فى الحكم ، كما فعل مبارك عندما وهمنا بإنه هو الدولة وبسقوطه تسقط الدولة .

وأحيى المجلس القومى لحقوق الانسان على تقريره حول أحداث ماسبيرو اللى أثبت إن مسيرة الاقباط تم الاعتداء عليها مرتين وإن القوات المسلحة هى من بدأت بالهجوم وكانت أول شهيد فى الاحداث هو الشهيد "مينا دانيال" ، وإن من قتل المصريين دهساً هى القوات المسلحة ، لذلك إحنا بنطالب أن يتولى التحقيق فى أحداث ماسبيرو جهة قضائية مستقلة ومحايدة .

القمص فلوباتير: أكبر دليل على عدم إستقلال القضاء العسكرى وعدم حياديته إننى من المفترض أن أكون متهماً مع علاء سيف الان ، فما قاله علاء قلته أنا وهاجمت المجلس العسكرى ورفضت ممارساته بنفس طريقة علاء لكن القبض على علاء أثبت لى إن للمجلس العسكرى حسابات أخرى

وكان لجمال عيد مدير الشبكة العربية لمعلومات حقوق الانسان كلمة سلطنت الناس وعجبتهم أوى لانه وصف المجلس العسكرى بإنه قليل القيمة وكذاب فهو قليل القيمة لانه ترك كل الخبراء والفقهاء وأعتمد فى معلوماته على المدعو "أحمد زبايدر" وهو بالنسبة للكذب إتفرجوا على الفيديو ده:

شهادة طنطاوى : الحاضر الغائب

اخترقنا قرار حظر النشر ها يا بلد .. حد ليه شوق فى حاجه؟

بصراحه هو كان قرار غير مقنع من الاساس .. على العموم اننا دلوقتى بقى عندنا نص أقوال سنطاووووى

وعزائى للغلابة المساكين اللى كانوا فاكرين ان الفشير هيطلع يقول مبارك هو اللى كل الجبنه قصدى هو اللى قتل المتظاهرين

ولو لاحظنا اجابات الشاهد سنطاوى هنلاقى انه كان شرابة خرج فى البلد دى حاجه كده ملهاش اى لزمه .. ولا عارف حاجه ولا يعرف حد ولا الهوا فى الطراوة .

وكمان القاضى مش بيسأل الاسئلة بتاعه المراوغه دىى اللى بنسمع عنها فى الافلام يعنى لما سأله عن الشهداء من ظباط الجيش مسألهوش هما ماتوا ازاى؟ انتو بتحققوا ولا لاء؟ ماتوا فين؟مين اللى موتهم؟

على العموم ان شايفه ان الشهاده دى مكنش ليها اى لزمه يعنى هو ولا شاهد نفى ولا شاهد اثبات عامل زى الحاضر الغايب كده جه زى مجاش .

وطبعا ده شئ المفروض اننا نكون متوقعينه .

السؤال بقى اللى سأله أحد أصدقائى وهو ده السؤال اللى هنكتشف بيه حاجات كتير جدا وهو :لو الجيش مجالهوش أمر بضرب المتظاهرين يبقى الجيش حمى الثورة من ايه بالظبط ؟

طالما كده كده مبارك ما قالش اضربوا المتظاهرين دول بالنار وخلصونى منهم يبقى الجيش نزل يعمل ايه ... محدش يقول نزل يساعد الشرطة فى حماية المنشأت اللى الشرطة كانت بتسرقها اصلاً.

ما علينا أهو المجلس إتحسب علينا "حمى " ونعوضها بقى الثورة الجاية.

وإليكم نص الشهادة : http://helpegypt.blogspot.com/2011/09/blog-post_25.html?spref=fb

عار إنك المجلس العسكرى

على غرار "عار إنك الرئيس " المقال اللى كتبه الاستاذ عبد الحليم قنديل واللى حصله بعديها ما حصل - مش عارفه هيعملوا فيا زيه كده ولا ايه - أنا النهارده بكتب عار إنك المجلس العسكرى لانى خايفه عليك لتكون زى مبارك ، مبارك اللى ما احترمش شعبه ولا قدره ولا كان بيعتبره موجود اساسا ، مبارك اللى كان بينزل قرارات من غير استشاراتنا ، مبارك اللى اهان كرامتنا وسخر ذيوله يعذبونا ، مبارك اللى حاكم مدنيين قدام المحــــــــــاكم العسكرية .

وهنا بقى نقول ستوب ، يا سيادة المجلس مش ملاحظ ان حضرتك زودتها من اول القرارت الغريبة و القوانين اللى بتنزل من غير ما يكون لينا راى فيها ، وحاجات كتير اووووى قالها ناس قبلى احسن منى وفاهمين عنى وكلها حاجات تدل اننا ممرناش بثورة وان المجلس العسكرى مش بيتبنى مواقف ثورية تؤيد هذه الثورة .

وكله كوووم ومحاكمه الناس عسكريا كوم تانى فى الاول اتقال انهم بلطجية وبعدين نقول انهم ناس بيسيئوا للقوات المسلحة وبعدين أصل دول إقتحموا سفارة إسرائيل الى ان وصلنا للوضع اللى احنا عليه دلوقتى فى ان كل واحد يقول رايه يروح علطول نيابة عسكرية ، ودده لانه انتقد المجلس العسكرى اللى بيحول المدنيين للمحاكم العسكرية عشان بيقولوا رايهم فى المحاكم العسكرية يعنى تحس كده اننا فى دايرة مغلقه من المدنيين للمجلس للنيابة للمدنيين للمجلس.

الغريب بقى ان الموضوع يوصل للاعلاميين والقضاة..... ياحلولى ناقص ايه ؟ ، لما الناس دى تروح النيابة العسكرية أمال احنا هنروح فين ووهيعملوا فينا ايه؟

يا سيادة المجلس ... ارجووووووك توقف المحاكامات العسكرية فورا بجميع أشكالها على جميع الناس بلطجية مجرمين مسلحين كله ،

ارجو ان حضرتك تحترمنا أكثر من كده ، وتحترم عقولنا واننا مش هنسامح فى اى تقصير تجاه الثورة ومطالبنا الى الان هى هى متغيرتش فى يوم.

عشان كده قررت إنى أنبه سيادتكم - للمرة الالف - انكم تتراجعوا فى قراراتكم حتى لا يكون المجلس العسكرى عار علينا

مش عارفه بقى بعد التدوينة العادية جدا دى هروح فين ياترى زى استاذ عبد الحليم قنديل ولا النيابة العسكرية... ربنا يستر

مجلسكم الموقر

يا سيادة المجلس مش معنى إنى هانزل يوم 27 مايو إنى عاوزه مجلس رئاسى او إنى عميلة وبثير الفتن وعاوزه أوقع بين الجيش والشعب اللى كنا دايما بنقول إنهم " إيد واحدة" أنا نازله لان ليا مطالب وشايفه ان نزولى ممكن يخليها تتنفذ ، ومش معنى إن بحب الجيش إنى منتقدش المجلس العسكرى ومش معنى إنى بنتقد المجلس إنى بتدخل فى الامن القومى للبلاد وبهدد أمن مصر لانى فاهمه كويس ان المؤسسة العسكرية شئ ومجلسكم الموقر شئ أخر .

وعشان كل ده وبما إن حضراتكم رضيتم تمسكوا البلاد فمينفعش انكم تتعاملوا معانا بمنطق بابا مبارك اللى مينفعش نتكلم عنه او ننتقده ، سيادة المجلس انا بحبك وبقدرك لكن القرارت اللى اتخذت فى الفترة الاخيرة مقلقلة والتهديدات بالاقتصاد والانهيار الامنى مش مريحانى ووصفنا بالعملاء مزعلنى جامد... وحتى لو انا كنت نازلة يوم 27 مايو ومطالبى مش محدده او حتى نازلة وانا معنديش مطالب متوقعش منكم انكم تقولوا عليا كده.... وشكرا عمنا المجلس

ابطال ميدان التحرير

نظراً لان ميدان التحرير اصبح بالنسبة لى مزار يومى

مكان بحب اروحه واشوف فيه نماذج لمصريين شرفاء

مكان اتجمع فيه مختلف الاطياف والطبقات والانتماءات

مكان تملؤه رائحة الحرية والشجاعة والامل دوماً

هناك رايت المصريين على كل لون باختلاف انتماءاتهم الحزبية والسياسية والاجتماعية والدينية

وعلى الرغم من الاختلاف فالسائد هناك هو الاحترام

احترام متبادل بين الجميع ، حيث لا خلاف لانك مسلم او قبطى او شيوعى او يسارى و يمينى او ملحد حتى

فالكل هناك مصريووون فقط .

فى وسط هذا الزخم رايت شابا يتحدث عن منعه لاحد البلطجية اراد ان يلقى بانبوبة وسط المتظاهرين يوم الاربعاء الدامى وفجاه انهمر فى البكاء ، لا احد يعلم سبب بكاؤه

ولكن بكاؤه أثر فى الجميع كبار السن قبل الشباب ، تأسفوا له على دموعه الغالية .

قال له أحد الرجال الكبار " يابنى متعيطش احنا كنا ميتيتن وانتو حيتونا تانى"

رسالتى الى هذا الشاب لا تبكى فإن شاء الله جهودكم لن تذهب سدى .

اترك الفيديو ليصف هذا المشهد

عمرو بدر يكتب : 25 يناير .. استقالة الرئيس ! http://ping.fm/CrOQE

إبراهيم عيسى يكتب: عارضوا الرئيس!

إبراهيم عيسى يكتب: عارضوا الرئيس!