التطور الطبيعى للحياه الماسخه

هههههههههههه .... بضحك من كتر المساخه اللى احنا عايشين فيها ... الحياه بقت ماسخه ومن غير طعم فعلا ...على العموم ده مش جديد وده مش موضوعنا انا بس حبيت أنوه عن الشكل الجديد للمدونه - اللى محدش بيعبرها- اللى بفكر اغير اسمها واخليه الشلتة النفسية عشان يليق مع الميول النفسية البحتة للمدونة.
انا بس كنت غايبه يومين كده عشان زى ما انتو عارفين وكل سنه وانتو طيبين العيد قرب جدا ولازم كونى بنت ابدأ فى الاعمال التنظيفية للمنزل وهو أكتر حاجه بكرهها ومن هنا تبدأعقدتى النفسية .
كل يوم وساعة ودقيقة وثانية ولحظة وهفوة بتعدى عليا وانا بروق البيت عشان العيد يجى بلعن فيها نفسى لانى بنت وبتخيل لو كنت ولد قد إيه الحياه كان هيبقى لونها بمبى وبتمنى من فلبى وبدعى ربنا انى اتحول الى ولد بقدرة قادر متعرفش ازاى ، المهم انى اتخلص من التنضيف ده.
هتقولى ده انتى تحمدى ربنا انك بنت على الاقل مفيش اى تحمل للمسئولية هتقعدى فى البيت وكل حاجه تيجى لغايه عندك
هاقولك كلا وفلا الاولاد دلوقتى هما الدلع كله لان الطبيعى ان الولد بيشتغل والشغل بالنسبه له حاجه طبيعيه وكمان عمر الرجاله او الاولاد ما بيعملو اى حاجه بجانب شغلهم ، يعنى مش مطلوب منه انه لما يروح البيت يعمل الاكل ويروق الشقه ويحمى العيال ويربيهم وياكلهم وينيمهم.
انما فى ستاااااات كتييييييييييير بتشتغل وترجع البيت تروق واكل وشرب وتسكت ده وتنيم ده وتضرب ده ... حاجه قرف من الاخر
كل ده ومش عاوزينى اتمنى انى اكون ولد
لكن هنقول ايه ... أمر ربنا؟